Goude ar galv da raktresoù lañset gant Kuzul-rannvro Breizh evit diorren filierennoù boued lec'hel e fell da Vro Kornôg Kreiz-Breizh diorren an implij eus produioù bio eus ar vro er pretioù stroll. Poc'hêr kumuniezh zo aet war ar renk evit bezañ ur c'horn-bro skouer hag evit reiñ lañs d'an dra-se en he fretioù stroll.
Reiñ talvoudegezh d'ar produioù eus ar vro ha kinnig marc'hadoù a-zoare d'ar broduerien
Kalite yec'hedel ar produioù, o orin hag o doare produiñ zo e-kreiz prederioù ar vevezerien bremañ.
Gant an implij eus produioù bio eus ar vro er pretioù stroll e c'haller sikour da sevel ur filierenn armerzhel tost d'an dud hag ober d'ar broduerien eus ar vro kavout fred da vat. Gant an dra-se e c'haller ivez reiñ talvoudegezh d'o froduioù a vo debret war-eeun war al lec'h.
Setu perak eo krog Poc'hêr kumuniezh gant an ober-se hag asantet he deus dont da vezañ ur c'horn-bro skouer.
Harpañ ar c'heginoù stroll
Ti al labour-douar biologel e Penn-ar-Bed (MAB 29) en deus komzet da gentañ gant dileuridi ar c'heginoù stroll dedennet gant an dra-se. Ur renabl kentañ zo bet graet eus doaoreoù mont en-dro pep framm (pourvezioù boued, koskor ha dafar). Gant MAB 29 e oa bet graet erbedadennoù da bep kegin diouzh o ezhommoù e-sell da lakaat anezho da implijout produioù eus ar vro.
E miz Kerzu 2013 e oa bet skrivet gant Bro Kornôg Kreiz-Breizh ha Poc'hêr kumuniezh un emglev evit kemer perzh e-barzh an taol.
Gant 5 kegin stroll eo bet sinet an emglev trizu (Bro Kôrnog Kreiz-Breizh, Poc'hêr kumuniezh, keginoù stroll) :
- Kantin-kêr Karaez
- Kantin-kêr Kerglof
- Kantin-kêr Plonevell
- Kantin-kêr Poullaouen
- Bod-lojañ ar Salet e Karaez
Lakaat ar c'heginoù stroll hag ar broduerien e darempred an eil re gant ar re all ha reiñ lañs d'an traoù er vro
Emañ MAB 29 o vont da ginnig d'ar pretioù stroll ur stummadur war an implij eus produioù bio eus ar vro pa vez keginet meuzioù.
E-keit-se emañ MAB 29 ha Kambr Labour-douar Penn-ar-Bed (KL 29) o labourat ivez evit frammañ ar c'hinnig produioù eus ar vro. Evit se emaint o sevel stummadurioù da lakaat ar broduerien d'ober anaoudegezh gant ar pretioù stroll. Emeur o renabliñ ar broduerien o defe c'hoant da gavout fred evel-se. Gant-se e vo savet ur c'hatalog gant ar broduerien a bourchaso boued d'ar pretioù stroll. Keit ha ma pado ar raktres-se e vo aozet kendivizoù etre ar geginerien hag ar broduerien evit krouiñ liammoù etre an holl dud-se. Ar soñj eo frammañ ar filierenn ha reiñ lañs d'an traoù er vro.
Pelloc'h e vo klasket lakaat Poc'hêr kumuniezh da rannañ he chemet gant ar pretioù stroll hag ar broduerien all e Bro Kornôg Kreiz-Breizh.